کوئٹہ (نمائندہ نوا ٹائمز اردو) — بلوچستان کے دارالحکومت کوئٹہ میں چین سے درآمد کی جانے والی 17 جدید بسیں جمعرات کو شہر پہنچ گئیں۔ ان میں 13 گرین اور 4 پنک رنگ کی بسیں شامل ہیں جو بالترتیب مردوں اور خواتین کے لیے الگ الگ چلائی جائیں گی۔ محکمہ ٹرانسپورٹ بلوچستان نے بتایا کہ ان بسوں کی خریداری پر کل 81 کروڑ روپے لاگت آئی ہے۔
خواتین کے لیے خصوصی پنک بس سروس
محکمہ ٹرانسپورٹ کے حکام کے مطابق چار پنک بسیں صرف خواتین مسافروں کے لیے ہوں گی جو شہر کے اہم روٹس پر چلیں گی۔ اس اقدام سے کوئٹہ میں خواتین کو محفوظ اور آرام دہ سفری سہولت ملے گی۔ باقی 13 گرین بسیں عام شہریوں کے لیے مختلف روٹس پر چلائی جائیں گی۔
یہ بھی پڑھیں: امریکا مزید ممالک کے شہریوں پر سفری پابندیاں عائد کرنے کی تیاری میں
81 کروڑ روپے کی لاگت اور مستقبل کا منصوبہ
یہ بسیں بلوچستان ماس ٹرانزٹ اتھارٹی کے تحت چلیں گی اور شہر کے مختلف علاقوں بشمول جیینی روڈ، سریاب روڈ، کوئٹہ سرینا چوک اور ائیرپورٹ روڈ پر خدمات انجام دیں گی۔ حکام کا کہنا ہے کہ آئندہ مرحلے میں مزید بسیں درآمد کی جائیں گی تاکہ شہریوں کو بہتر عوامی ٹرانسپورٹ مہیا کی جا سکے۔
