اسلام آباد – حکومتِ پاکستان نے استعمال شدہ گاڑیوں کی درآمد سے متعلق موجودہ اسکیموں میں بڑی تبدیلی پر غور شروع کر دیا ہے۔ وزارتِ تجارت کی تیار کردہ سمری کے مطابق پرسنل بیگیج اسکیم کو مکمل طور پر ختم کرنے جبکہ گفٹ اسکیم اور ٹرانسفر آف ریزیڈنس اسکیم کو سخت شرائط کے ساتھ جاری رکھنے کی تجویز ہے تاکہ ان اسکیموں کے ممکنہ غلط استعمال کو روکا جا سکے۔ یہ سمری اقتصادی رابطہ کمیٹی (ای سی سی) کو منظوری کے لیے بھجوائی گئی ہے۔
موجودہ اسکیموں میں خامیوں کا خاتمہ
حکومتی ذرائع کے مطابق پرسنل بیگیج اسکیم کے ذریعے کئی سالوں سے بڑے پیمانے پر گاڑیاں درآمد کی جا رہی تھیں لیکن اس میں کسٹم ڈیوٹی اور ٹیکسوں سے بچنے کے متعدد کیسز سامنے آئے۔ اسی طرح گفٹ اسکیم اور ٹرانسفر آف ریزیڈنس اسکیم کو بھی بعض افراد غیر قانونی طور پر استعمال کرتے رہے ہیں۔ وزارت تجارت کا موقف ہے کہ نئی پالیسی سے نہ صرف قومی خزانے کو نقصان سے بچایا جائے گا بلکہ مقامی آٹو انڈسٹری کو بھی تحفظ ملے گا۔
یہ بھی پڑھیں: بلوچستان کی قابلِ کاشت زمین سکڑ کر 7.2 فیصد رہ گئی، ماہرین نے سنگین نتائج کی وارننگ دیدی
ای سی سی کا حتمی فیصلہ متوقع
اعلیٰ حکومتی افسران نے تصدیق کی ہے کہ ای سی سی کا اجلاس جلد طلب کیا جا رہا ہے جس میں یہ سمری پیش کی جائے گی۔ اگر تجاویز منظور ہو گئیں تو اگلے چند ہفتوں میں استعمال شدہ گاڑیوں کی درآمد پر نئی پابندیاں نافذ العمل ہو سکتی ہیں۔ ماہرین کا کہنا ہے کہ اس اقدام سے گاڑیوں کی مقامی مارکیٹ میں قیمتوں پر بھی مثبت اثر پڑ سکتا ہے۔
